Meira kunning

Hugla er stovnað sum áhugafelag í oktober 2020 við Biritu Arge sum forkvinnu, Ingilín Berg sum næstforkvinnu og Elin N. W.Tausen sum kassameistara. Endamálið var m.a. at stovna eina endurskapanarmiðstøð. Vit hava áðrenn hetta samstarvað í fleiri ár um endurnýtsluverkætlanir við børnum, sum eru framsýndar í býnum. Við endurskapanarmiðstøðini Hugla ynskja vit at seta sjóneyku á endurnýtslu tilfar sum tilfeingi, og gangnýta tað ístaðin fyri at koyra tað á ruskstøðina. Vit savna tilfarið í samstarvi við m.a. vinnuna og Fountainhúsið. Síðan seta vit tað pent á hyllar á miðstøðini, so tað er klárt og innbjóðandi hjá øðrum at brúka. Nógv av arbeiðnum er sjálvboði og bjóða vit ókeypis tiltøk til m.a. familjur. Hetta er ein góður háttur at skapa burðadygga mentan, og ávirka keyp og koyr burtur mentanina. Hugla er ætla til øll at nýta, og er tað møguligt hjá stovnum og skúlum at fáa ókeypis tilfar, sum kann heintast í hølinum, sum er á Karlamagnusarbreyt í Hoyvík. Eisini skipar Hugla fyri undirvísing, verkstovum og tiltøkum.

Søgan

Vit byrjaðu í 2015 við endurnýtslu verkætlanini Ljós, sum var framsýnd í Perluni. Tað luttóku 9 dagstovnar í verkætlanini, og komu nógvir stovnar og skúlar at vitja framsýningina.

Í 2016 arbeiddu vit við Endurnýtsluverkætlanini Ævintýraheimur í viðarlundini. Hendan verkætlanin var gjørd sum samstarv ímillum fleiri ymiskar stovnar, so sum dagstovnar og skúla, og luttóku Fountainhúsið og Musikskúlin eisini. Viðarlundin var umskapað til ein Ævintýraheim úr endurnýtslu, og stovnarnir arbeiddu við ævintýrum á ymiskan hátt. Lósu søgur, sungu, spældi leik v.m. Hvør stovnur hevði hvør sítt øki í viðarlundini at menna. Hendan verkætlanin vann grønu gávuna frá Etika.

Í 2017 arbeiddu vit við verkætlanini Plast sansarúm, sum var framsýnd í Perluni. Í hesi verkætlan settu vit sjóneykuna á plastdálking og hvussu skaðilig hon er. Børnini savnaðu rusk í náttúruni, og vit savnaðu alt plastikki sum børnini høvdu í teirra matpakkum, og gjørdu ymiskt burtur úr tí. Hetta endaði sum ein framsýning við evninum náttúra, hagi og fjørða. Har tað var møguligt hjá øðrum at fáa kunning um plastdálking, á ymiskar hættir.

Vit høvdu ikki havt nakað fast høli til at goyma endurnýtslu tilfarið í, sum var ógvuliga rúgvumikið, og var tað allatíð ynski at fáa eina endurskapanar miðstøð, sum kundi hava eina regluliga innsavnan. Í oktober í 2020 bleiv áhugafelagið Hugla stovnað við m.a. endamálinum at fáa eitt høli har vit kundu bjóða øðrum at skapa úr endurnýtslu, og skipa fyri tiltøkum, undirvísing og verkstovum.

Í januar 2021 eydnaðist tað okkum at fáa eina endurskapanarmistøð, og hava vit fingið nógv endurnýtslu tilfar at skapa úr. Vit hava eina regluliga innsavnan, og hava skipað fyri ymiskum tiltøkum og verkstovum. Vit hava eisini havt vitjan av skúlum, sum hava havt áhuga í okkara arbeiði, og sum hava brúkt vitjanina, sum part av teirra útbúgving. Tað er stórur áhugi fyri tí arbeiðnum sum vit gera, og ynskja vit at halda fram at menna okkara arbeiði víðari. Í september er ætlanin at hava Hugla dag, hetta verður ein dagur har øll hava møguleika at luttaka. Tað luttaka fleiri sjálvboðin í arbeiðnum hjá Hugla.

Hugla endurskapanarmiðstøð er á Karlamagnusarbreyt 22 í Hoyvík

Tað møuligt hjá øllum at koma á miðstøðina at skapa úr endurnýtslu

https://fb.watch/6cg32Ukq0k/