Further Information

Dagførdir skógvar til føroyska búnan í bestu góðsku.

Søgan
Alessandro Rossetti er italiumaður og hevur síðan hann var blaðungur fingist við at gera skógvar. Her hevur hann gjørt hondgjørdar skógvar fyri navnframar fyritøkur so sum Armani, Christian Louboutin og Manolo Blahnik. Hann hevur tí bæði hollar royndir og neyðug sambond innan hesa vinnuna.

Alessandro er giftur við Sáru. Tá ið hann kom til Føroyar á sinni, fall hann beinanvegin fyri føroyska búnanum. Honum dámdi útsjóndina, góðskuna og ernið, ið er sett í samband við føroyska búnan. Men sum skósmiður undraðist hann yvir sniðið og góðskuna á skónum. Tað er her okkara søga byrjar, tí alt fyri eitt kom fyrst hugskotið, síðani sniðgevingin av tí skógvi, sum vit í dag søkja hópfígging til.

Nú eru vit byrjaðir við dagføringini av skónum til mannin, men kvinnuskógvurin er næsta stigið.

Eftir drúgva tilgongd, har ið fleiri frumsnið hava verið roynd, tað verði seg bæði snið og leður, eru vit nú sannførdir um at hava smíða skógvin, vit meta nøktar tørvin hjá føroyingum.

Hugin kom inn í verkætlanina av fyrstan tíð við ,,royndarfótum”, har hann gekk í fyrsta frumsniði. Hugin nýtir framvegis sama parið. Seinri kom Hugin inn í verkætlanina við tí vinnuliga íblastrinum, sum manglaði og tekur sær av hesum partinum av virkseminum hjá GAGN í dag.

Skógvurin
Grundað á royndir frá frumsniðum og prát við føroyingar, hava vit funnið fram til tríggjar høvuðstørvir, tá tað snýr seg um besta skógvin til føroyska búnan:

| Góður at ganga í | Snøggur | Haldgóður/slitsterkur |

Tí hava vit lagt dent á ein skógv av hágóðsku. Skógvurin er góður at ganga í og situr væl. Leðrið er bleytari enn á øðrum skóm, sum ger at føturnir ikki gerast eymir, samstundis er talan um leður, sum tolir regn og føroyska veðurlagið annars. Sollin er úr leðri, og ikki træi, sum ger, at skógvurin gevur seg, tá ein gongur, og harvið troyttast føturnir ikki. Eisini leggja vit gummi undir sollin so skógvurin gert eyka slitsterkur. Við øðrum orðum kann ein mæla Havnargøtur upp og niður ella dansa eina heila nátt uttan at hava eymar føtur dagin eftir. Fyri at fáa smíðað ein snøggan skógv, hava vit fingið sniðgevan Davide, ið Alessandro kennir væl í arbeiðshøpi, at hjálpa til at sniðgeva skógvin. Í hesum sambandi hava vit fleiri ferðir verið í Italia fyri millum annað at taka støðu til, hvussu endaligi skógvurin skuldi síggja út.

Úrslitið kunnu tit nú ogna tykkum her á Hópfígging ella stuðla hesi hópfígging á annan hátt.

Takk fyri.