Further Information

Víkingaskipið

Stúðla føroyska víkingaskipinum!
Tey fyrstu 40 ið stuðla, fáa møguleikan at koma við á fyrsta almenna túrin við nýggja víkingaskipinum.

Søgan

Felagið Víkingaskipið byrjar við formanninum Finnbjørn Hovskarð:

"Sum útisiglari í mong harrans ár eri eg komin víða um, og havi sæð hvat hini eiga og hava varðveitt. Og hevur tað altíð harma meg, at vit føroyingar ikki gera sum hini. Trælalyndi stingur djúpt í føroyinginum, og tá er bert tap í hendi.

Lat meg byrja við upprunan til alt tað, sum er í dag.

Heimkomin til Hovs í 2003, fór eg ein túr oman á kaiina, og har sá eg gamla handilin hjá abba mínum. Tá runnu nógv gomul minnir fram fyri meg, har eg hevði traðka mínar barnaskógvar. Men hugtyngslan neyv á meg av at síggja, hvussu húsini vóru hoknað. Kjallarahurðarnar hingu skeivar og vindeyguni í skjøldrinum vóru burtur.

Ringdi til systkinabarnið, sum átti húsið, og bað hana um loyvi at tætta tað so frætt, at turt varð. Stovnað vóru feløgini Hovs fornminnisfelag og Savnið á Mýru. Síðani varð farið til verka, eitt langt og strævið stríð, har ongir pengar vóru. Pengar máttu lænast. Men so við og við, so stóð handilin aftur í síni vælmakt.

Fiskastovan var okkara fundarhøli, og har spruttu nógv hugskot fram. Fyrst varð byrja við at halda víkingadagar, og ein ferðavinna sá eisini dagsins ljós. Hvat hava hini og hví kunnu okur ikki teljast millum tey? Soleiðis gjørdist hetta til eitt hugskot, at byggja eitt víkingaskip og neyst.

Í oktober 2013 var fundur í Fiskastovuni, har skráin var at stovna eitt felag, har endamáli var at byggja skip og neyst. Stríggið hevur gingist, men við vilja, dirvi og áræðið, so vinst á mál. Síggja vakurleikan og stórleikan í tí smáa.

Hugskotið til Víkingaskipið

Hugskotið kom, tá okur fóru at hava víkingadagar. Tað kom veruliga av, at okur tá høvdu fingið húsini á Mýri, og sett tey í stand so frætt, at tað kundi gerast eitt savn.

Eitt savn fyri tað tíðina, tá ið føroyingurin fór út at fiska, og saltfiskurin bleiv landaður upp at vera vaskaður, og hann bleiv turkaður á fiskastykkinum.

Fiskastovan var har. Inni í fiskastovuni, tá man sat har, so mintist eg aftur til tey síðstu árini tá fiskurin var har. Tað fekk meg at hugsa um at varðveita. At okur hava skyldu at varðveita okkara fornu søgu.

Einki kann vera verri enn ein søguloysingur. Hví ikki vera javnt við onnur ið varðveita sina víkingamentan? Og har komu vit fram til at vit skuldu gera eitt víkingaskip og eitt neyst, har vit kunna savnað okkara víkingamentan.

Hetta soleiðis at ungdómurin kann fara inn í eitt víkingahús. Og at skúlarnir og børnini kunna síggja, hvat ið tað merkti at liva í víkingatíðini. Hvussu dugnaligir teir vóru til at smíða. Teir fóru um høv. Og hvussu dugnaligir teir vóru til at sigla víða hvar.

Víkingamentanin er kend um allan heim fyri sín dugnaskap at sigla. Og okur føroyingar skulu kalla okkum fyrisiglandi tjóð.

Felagið var stovnað og síðani var at fara til verka.

Verkætlanin hevur veri tung, men tað hevur alla tíðina gingið framá. Og loksins eru vit komnir so langt fram, at fyrstu viðarbularnir skjótt fara at koma til landi, og tað er at fegnast um.

(Frá samrøðu við Finnbjørn umborð á Sluppuni Jóhannu, July 2021)

The Last Viking

Finnbjørn er maður við nógvari søgu. Hevur siglt um allan heim og er ein av fáu sjómonnunum av gamla slagnum, ið vit eiga eftir.

Síggj filmsbroti - THE LAST VIKING HER:

https://youtu.be/rSqi3i7PAgI

Føroyar hava altíð veri ein tjóð, knýtt at sjónum. Sjógvurin var vegurin. Fyrstu føroyingarnir komu ikki loftvegis. Sjóðmentanin er fastgrógvin í okkara mentan og samleika. Tí verður víkingaskipið ein livandi mynd av elstu føroysku søguni og sjómentan okkara.

Sniðið á føroyska bátinum kann sporast aftur til gomlu víkingaskipini, bygd í Vesturnoregi.

Skipið verður bygt í Hovi. Hov var heimstaður høvdingan Havgrím, haðani hann stýrdi helmingin av Føroya landi.

Og Hov er ein hin ríkasta staður í Føroyum við fornminnum úr víkingatíð og fornminnum frá keltunum eisini.

Rúnasteinurin í Hovi

Skipið

Seglið

Seglini vera spunnin úr gráari føroyskari ull, ið verður mett sum sterkasta ullin. Seyma í rútum, so møguligt verður at fáa segli seyma um alt landi.

Støddir

Skipið verður 23,8 metrar í longd og 5,1 metrar í breidd. Har verða 32 árar, har tveir mans eru fyri hvørja ár. 64 rógvarar tilsamans. Harvið er eisini pláss til eini 50 stríðsmenn afturat.

Bygging

Skipið verður høgt út við øks og smíða á staðanum. Smiðjan verur bygd við síðurnar av, har naglarnir verða gjørdir til skipið á staðnum. Alt á gamlan hátt.

Skipið verður bygd av føroyingum, í Føroyum og til føroyingar, á sama hátt sum fyri 1000 árum síðani. Neystið verður bygt sum eitt víkingalanghús.

Langhúsið verður brúkt sum neyst, sum savn, mentanarhús og til tiltøk sum konsertir, borðhald og veitslur. Alt kemur at líkjast so nógv sum til ber teimum gomlu víkingahúsunum, men eisini við nútímans tøkni.

Allar tekningarnar eru klárar. Keyptar eru fýra neystagrundir í Hovi. Arbeitt verður í løtuni við at fáa tveir viðarbular heim, og síðani verður rættuliga farið í gong.

Allar tekningarnar eru klárar. Hava keypt 4 neystagrundir í Hovi. Arbeiða nú við at fáa tveir stórar viðarbularnir heim, og síðani verður rættulig fari í gongd.

Stuðla Víkingaskipinum

Stúðla føroyska víkingaskipinum!
Tey fyrstu 40 ið stuðla, fåa møguleikan at koma við fyrsta almenna túrin við nýggja víkingaskipinum.

"bundin er bátleysur maður" -